Kæru vinir, bestu þakkir fyrir frábært samstarf á árinu sem er að líða. Við vonum að hátíðirnar hafi verið ykkur gjöfular og friðsælar. 

Það var svo gaman að búa til stafræna snilld fyrir ykkur á liðnu ári og við bíðum spennt eftir því að taka upp þráðinn á því nýja.

Völundarsmíðar ársins 2024

2024 var afar gott ár hjá okkur í Júní, það stærsta frá upphafi! Ekki bara í júní, samt. Alla hina mánuðina líka. 

Við kláruðum ótal mörg spennandi og skemmtileg verkefni, gáfum út allskonar vefi, snjallar lausnir, skrifuðum skýrslur og gerðum verðmætar greiningar fyrir viðskiptavini okkar.

Júníversinn víkkar, breikkar og blómstrar (vex og dafnar)

Árið 2024 var mjög viðburðaríkt fyrir Júníversinn okkar – því á meðan við unnum öll þessi verkefni saman vorum við að stækka við okkur, þroskast, dafna og blómstra. Júníversinn er lítið án fólksins sem skapar hann, svo það yljar okkur um hjartarætur í hvert sinn sem nýr hugarheimur bætist við hann.

Við fengum nýjan aðstoðarframkvæmdastjóra, hann Andra Úlfarsson – og James DeBlasse gekk til liðs við okkur sem nýr tækniþróunarstjóri eða CTO. Þar að auki bættust fjórir nýir forritarar, fjórir nýir hönnuðir og tveir nýir verkefnastjórar í hópinn.

Það er leikur að læra

Við bættum þó ekki bara við okkur fólki – heldur bætti fólkið okkar líka við sig þekkingu og miðlaði henni áfram. Fyrir utan það fórum við á ótal fyrirlestra, skrifuðum greinar í blöðin, heimsóttum ráðstefnur og tókum þátt í keppnum. 

Til að mynda hrepptum við íslensku vefverðlaunin fyrir vefinn okkar, juni.is, hjá Samtökum vefiðnaðarins (SVEF) árið 2023 í flokknum Fyrirtækjavefur ársins (meðalstór fyrirtæki)! Þar að auki voru verkefnin okkar tilnefnd til vefverðlauna í flokkunum fyrir Samfélagsvef ársins, App ársins, Opinberan vef ársins, Stafræna lausn ársins og Markaðsvef ársins.

Og síðast en ekki síst fengu Fanney og Eva vottanir sem Scrum-meistarar, þótt þær hafi raunar verið algjörir meistarar fyrir það. Núna er það bara skjalfest, þinglýst og lögfest.

Addý hélt snilldarerindi um Stafrænar og sjálfbærar lausnir morgundagins á fundi hjá Ský og hönnunarteymið okkar sótti Design Talks ráðstefnuna í Hörpu heim til að hlýða á frábæra fyrirlestra. 

Júlía skaust svo til Barcelona til þess að taka þátt í dómnefndarstörfum Art Directors Club Europe fyrir hönd FÍT, en hún dæmdi í flokknum Mobile & Interactive.

Nýja árið hefst í Júní

Takk kærlega fyrir samstarfið á árinu sem er að líða, kæru vinir, og gleðilegt nýtt ár.

2024 var ótrúlega gjöfult og skemmtilegt ár hjá okkur – og það er að miklu leyti frábæru kúnnunum okkar að þakka. 

Við erum þakklát fyrir að hafa náð að anda djúpt og kjarna okkur aðeins núna um hátíðirnar. Við vonum að þið hafið sömuleiðis átt friðsæl, litrík og björt áramót.

Þið vitið svo auðvitað af okkur ef ykkur vantar einhverjar stafrænar flugeldasýningar – það má jú skjóta upp rakettum á netinu allan ársins hring. Svo skapa stafrænar rakettur heldur ekkert svifryk.

Við hlökkum til samstarfsins á nýja árinu.

Kærar nýárskveðjur,

Júní